Sjølve kurset finn du her,

og her er vedleggi – eitt forenkla og eitt meir realistisk skjema over signalgangen i eit lydanlegg.

Det kjem meir, eg skal laga til ei meir ordentleg utgåve av kurset etterkvart. Det er litt tøft at dette, so vidt eg veit, er det fyrste meir eller mindre fullstendige grunnkurs i lydteknikk på nynorsk på nettet, so langt mi vankunne femnar. Viss de er i tvil um noko som står i kurset, er det berre å ta kontakt! post alfakrull frilyd punktum tk skulle fungere.

Eg prøvde ut Mandriva fyrst. Det er ein flott distribusjon, men der verka ikkje vevkameraet skikkeleg. So fekk eg brått hug til å sitja i times- og dagavis og lesa rettleiingar og mødesamt setja upp maskina. Difor la eg inn Arch linux.

Inntrykket etter eit par dagars bruk er at det tek tid å setja upp maskina, du må vera datagauk, og du må lesa deg upp. Det du får att, er ganske god oversikt over koss systemet fungerer og rask uppstart. Ikkje sidan forsøki mine med BeOS har eg hatt ei maskin som starta so raskt!

Eg kjører XFCE som skrivebord, og Opera som net- og epostlesar. Eg er nøgd. Ting går kjapt og fint, og Opera (som eg ikkje har brukt noko serleg før) er overraskande bra. No står det att å prøve ut alle lydprogrammi eg har lagt innpå. Eg har tenkt å bruke maskina til å ta upp med Ardour, nemleg. Gler meg litt til å sjå um noko slikt kan verke på ei maskin som, samanlikna med ei vanleg maskin i dag, ikkje er serleg rask.

Røynslor til i dag, 8. februar: Ardour og Jack verkar finfint. Eg har spelt inn… skal me sjå… 8 spor i 48 KHz til no, og det er ingen vanskar. Eg får sjå når eg skal til med miksing, klang og EQ.

Eg er på utkikk etter ein analog fleirsporsupptakar. Um du har ein 4-spors kassettupptakar, ein Tascam 388 eller ei kvart- eller halvtums spolebandmaskin i god stand og med gode hovud: Ta kontakt!

(Det høyrer med til soga at eg knapt har pengar å kjøpe for, men eg jobbar med saken.)

Det finst sjølvsagt mange slag ekkopedalar. Alt for mange. Billege, dyre, analoge, digitale (eller band!), med eller utan ordentleg forbikopling, og med eller utan  ymse tilleggsfunksjonar: pingpong, modulasjon og so bortover.

Eg hugsar då eg begynte å spela elgitar, og fekk mine fyrste effektboksar. Det viktigaste (reint bortsett frå å få tak i dei) var at dei let bra. Eg er litt glad for å seia at det framleis er det viktigaste: Eg vil ha ein pedal som let bra. Samstundes bør han vera analog (men det ser ut som eg må droppe det, gett), ha ordentleg forbikopling (engelsk: true bypass), og han bør vera billeg.

Eg har sikkert for lite å gjera, men eg har altso spekulert litt på dette, og trur eg endar med å byggje ein sjølv. BYOC ping-pong delay. Pedalen skal sjølvsagt heite Dvergemål.

Men eg er open for andre forslag, altso.  Eg har alt sett på Biyang AD-8. Dette er ein billeg pedal, og sikkert ikkje av toppklasse, men han har same brikka som BYOC-pedalen, og er ei oppgradering frå AD-7, som eg har prøvd. Den var for so vidt artig, og eg likte rundgangslyden, der pedalen matar tilbake ekkosignalet i krinsen og legg endå meir ekko på. MXR Carbon copy har eg òg sett på. Flott lyd, men eg vil ha lengre ekkotid. Memory man, Memory lane og andre analoge pedalar er jaddi meg for dyre. So det får bli digital, då. Og tenk å byggje ein sjølv, og kunna kalle han for Dvergemål! Tøft, seier eg.