Eg prøvde ut Mandriva fyrst. Det er ein flott distribusjon, men der verka ikkje vevkameraet skikkeleg. So fekk eg brått hug til å sitja i times- og dagavis og lesa rettleiingar og mødesamt setja upp maskina. Difor la eg inn Arch linux.

Inntrykket etter eit par dagars bruk er at det tek tid å setja upp maskina, du må vera datagauk, og du må lesa deg upp. Det du får att, er ganske god oversikt over koss systemet fungerer og rask uppstart. Ikkje sidan forsøki mine med BeOS har eg hatt ei maskin som starta so raskt!

Eg kjører XFCE som skrivebord, og Opera som net- og epostlesar. Eg er nøgd. Ting går kjapt og fint, og Opera (som eg ikkje har brukt noko serleg før) er overraskande bra. No står det att å prøve ut alle lydprogrammi eg har lagt innpå. Eg har tenkt å bruke maskina til å ta upp med Ardour, nemleg. Gler meg litt til å sjå um noko slikt kan verke på ei maskin som, samanlikna med ei vanleg maskin i dag, ikkje er serleg rask.

Røynslor til i dag, 8. februar: Ardour og Jack verkar finfint. Eg har spelt inn… skal me sjå… 8 spor i 48 KHz til no, og det er ingen vanskar. Eg får sjå når eg skal til med miksing, klang og EQ.

Eg er på utkikk etter ein analog fleirsporsupptakar. Um du har ein 4-spors kassettupptakar, ein Tascam 388 eller ei kvart- eller halvtums spolebandmaskin i god stand og med gode hovud: Ta kontakt!

(Det høyrer med til soga at eg knapt har pengar å kjøpe for, men eg jobbar med saken.)

Eller kva?

Noko er alt gjort. Me har lånt eit beist av ei 1-toms 16-sporsmaskin, ein Tascam 85-16, som bør vera brukbar til og med til kritiske upptak. Me manglar å kjøpe lydband, og å avmagnetisere, rense og justere ho. Rainer er utdanna både svak- og sterkstraumselektrikar, og er i stand til å justere og setja opp maskinene skikkeleg. Det er ein viktig del av det å ha eit godt lydstudio.

I tillegg til dette har eg privat kjøpt ein mindre upptakar, ein  Fostex 80. Dette er ei kvarttoms 8-sporsmaskin, liti og snerti. Eg har òg kjøpt ein Fostex 450 8-kanals 4-buss upptaksmiksar som høyrer med. Dette er kjekt og transportabelt til mindre upptak, og eg har tenkt å bruke det sjølv heime. I tillegg er lydbandet billegare – om lag 150 kr for ein rull i staden for vel 1000 for ein 1-tomsrull til Tascamen. Frå før har eg eit par OK nærfeltsmonitorar frå Tascam, og me kan låne miksar, mikrofonar, stativ og kablar frå ungdomslaget. Millombels studiorom kan vera på bygdahuset. Me er alt i gang, godtfolk.

Det me treng for å koma skikkeleg upp og gå, er ein god masterupptakar (sjølvsagt helst halvtoms, men me kan godt ta td. ein kvarttoms Otari MX-5050, om nokon har ein liggande, nokre gode mikrofonar,mikrofonforsterkarar,analoge effektar (plateklang og ekko), kompressorar og anna dynamisk utstyr, samt ein liten her av smådingsar.

På sikt treng me òg både større og mindre upptakarar (tenk alt frå Nagra til Studer), samt eit betre upptaksrom. Kort sagt, og dette er alvorleg meint: Send pengar! Kontakt oss på epost: post på frilyd punktum tk.

PS: Eg hadde tenkt å skrive «ljod» for «lyd» her, men det høvde dårleg med namnet på netstaden (frilyd). Difor, altso.