Frilyd » linux

Arch eller Mandriva?

eivind — Mon, 16 Feb 2009 10:56:35 +0000

Eg blir visst aldri fornøgd. No har eg brukt Arch linux på den vesle maskina mi ei stund, og er imponert både over uppstartstidi og mykje anna. Men eg er misfornøgd med to ting som er viktige for meg: Automontering og autonetverk. Eg vil at maskina skal ta seg av alt eg puttar inn av pliggar [dvs. minnepinnar] og dilikt, og eg vil at maskina skal prøve å vera påkopla netet heile tidi. Det går tydeleg an i Arch, det er ikkje det, men eg har korkje fått netverkshandteraren, wicd eller andre måtar til å funke i Arch. Eg byrjar å gå lei av akkurat det.

Der kjem Mandriva inn som eit godt døme på noko som verkar utan vidare. Men der må eg truleg mekke for å få uppstartstidi kortare, og elles skjera burt ein del eg ikkje treng (harddrake ved uppstart og slikt). Det er superlett i Arch – /etc/rc.conf inneheld alt du treng og ikkje treng. Spørsmålet er altso kor mykje eg gidd å styre, anten med Arch eller Mandriva… :-/

Helsing Eivind, som er litt lat og berre vil ha linuxdistribusjonen sin til å verke perfekt med ein gong…

Det er lov å bruke fri programvare.

eivind — Sun, 08 Feb 2009 20:39:41 +0000

Til alle dykk som trur at “gratis dataprogram” tyder “ulovlege dataprogram”, og at det er på kanten av loven å laste ned program:

De har lete dykk lure. Det er lov å bruke og endre program gratis, fritt, lovleg, i alle samanhengar. Overalt og uansett.

Sjølvsagt med det atterhaldet at du passar på å bruke fri programvare (definisjonar her og her). Det tyder altso noko anna enn Windows, Word og Powerpoint – ja, det finst noko anna. Dette er program som har andre namn enn dei du er vane med – dei heiter til dømes Mandriva Linux og Openoffice. Men dei verkar på um lag den måten du er van med, og viktigast: Dei er frie for kven som helst å bruke, endre, gje vidare og gjera um lag kva du vil med. Heilt lovleg. Og særs mykje finst på nynorsk, fordi folk har vilja og kunna umsetja. Dugnad, heiter det, og kven som helst datakunnig nynorsking kan vera med!

So kva ventar du på? Hiv ut Windows, kjøp aldri meir eit einaste program! Men å gje ein skjerv er noko heilt anna. Det er både lov og rosverdig.

Ny Linux på ny maskin

eivind — Fri, 30 Jan 2009 18:08:35 +0000

Eg er dirigent i skulekorpset i år, og får ei godtgjering for det arbeidet. Ein del av denne har eg no brukt på å kjøpe meg ei liti maskin, ei LG X110. Dette er ei maskin med 160GB harddisk og 1GB (snart 2) arbeidsminne. Det gjekk ikkje å få tak i ei slik maskin utan windows, men det gjer sjølvsagt ingenting: Innan sers kort tid var windows ute, og Linux inne.

Eg prøvde ut Mandriva fyrst. Det er ein flott distribusjon, men der verka ikkje vevkameraet skikkeleg. So fekk eg brått hug til å sitja i times- og dagavis og lesa rettleiingar og mødesamt setja upp maskina. Difor la eg inn Arch linux.

Inntrykket etter eit par dagars bruk er at det tek tid å setja upp maskina, du må vera datagauk, og du må lesa deg upp. Det du får att, er ganske god oversikt over koss systemet fungerer og rask uppstart. Ikkje sidan forsøki mine med BeOS har eg hatt ei maskin som starta so raskt!

Eg kjører XFCE som skrivebord, og Opera som net- og epostlesar. Eg er nøgd. Ting går kjapt og fint, og Opera (som eg ikkje har brukt noko serleg før) er overraskande bra. No står det att å prøve ut alle lydprogrammi eg har lagt innpå. Eg har tenkt å bruke maskina til å ta upp med Ardour, nemleg. Gler meg litt til å sjå um noko slikt kan verke på ei maskin som, samanlikna med ei vanleg maskin i dag, ikkje er serleg rask.

Røynslor til i dag, 8. februar: Ardour og Jack verkar finfint. Eg har spelt inn… skal me sjå… 8 spor i 48 KHz til no, og det er ingen vanskar. Eg får sjå når eg skal til med miksing, klang og EQ.