Frilyd » utstyr

Tascam 388 i hus. Juhu!

eivind — Tue, 01 Sep 2009 19:45:50 +0000

Svein Hansen var so snill å ta kontakt med meg her på frilyd, og slik har det seg at eg har vorte eigar av ein Tascam 388! Han er førebels ikkje i orden (treng truleg ny kapstandrivreim, og det har eg kjøpt), men eg har tru på at eg skal få han i stand. Eg skal skrive ei uppdatering her no og då. Til so lenge skal eg berre syne dykk eit bilete av herlegdomen. Eg gler meg til å ta fatt! Og no kan eg ikkje skrive meir, for eg skal stad og reingjera han litt før eg legg meg

Tascam 388, nett pakka upp.

Har nokon ein upptakar?

eivind — Thu, 08 Jan 2009 08:44:19 +0000

Det ser ut som eg heng litt etter – alt skal tydelegvis vera digitalt no, og dei som likevel skjønte at analogt var bra, har raska med seg alle dei gode upptakarane, og vil ikkje kvitte seg med dei. Eg er visst ingen rask mann, men eg får prøve her og vone at rett person les innlegget:

Eg er på utkikk etter ein analog fleirsporsupptakar. Um du har ein 4-spors kassettupptakar, ein Tascam 388 eller ei kvart- eller halvtums spolebandmaskin i god stand og med gode hovud: Ta kontakt!

(Det høyrer med til soga at eg knapt har pengar å kjøpe for, men eg jobbar med saken.)

Eg treng hjelp…

eivind — Sat, 13 Dec 2008 17:42:09 +0000

Eg har ein Fostex 80-upptakar eg ikkje får til å verke skikkeleg. Kan du hjelpe meg? Eg har prøvd på spor 2 og 3 so langt. Upptaket høyrest fint ut i starten, men so søkk nivået – spesielt høgfrekvensane – brått. Eg har skrive ei litt nøyare skildring av problemet her. Ta kontakt viss du har eit tips!

Dvergemål

admin — Fri, 12 Dec 2008 23:26:25 +0000

Eg er litt i stuss på om eg ein dag, når/viss eg får råd, skal kjøpe ein ny ekkopedal til gitarbruk. På engelsk seier me «delay», dvs. forseinking, og de veit sjølvsagt at det er det akkurat det pedalen gjer: Lagar forseinkingar, ekko, som vart kalla «dvergemål» i Noreg før.

Det finst sjølvsagt mange slag ekkopedalar. Alt for mange. Billege, dyre, analoge, digitale (eller band!), med eller utan ordentleg forbikopling, og med eller utan ymse tilleggsfunksjonar: pingpong, modulasjon og so bortover.

Eg hugsar då eg begynte å spela elgitar, og fekk mine fyrste effektboksar. Det viktigaste (reint bortsett frå å få tak i dei) var at dei let bra. Eg er litt glad for å seia at det framleis er det viktigaste: Eg vil ha ein pedal som let bra. Samstundes bør han vera analog (men det ser ut som eg må droppe det, gett), ha ordentleg forbikopling (engelsk: true bypass), og han bør vera billeg.

Eg har sikkert for lite å gjera, men eg har altso spekulert litt på dette, og trur eg endar med å byggje ein sjølv. BYOC ping-pong delay. Pedalen skal sjølvsagt heite Dvergemål.

Men eg er open for andre forslag, altso. Eg har alt sett på Biyang AD-8. Dette er ein billeg pedal, og sikkert ikkje av toppklasse, men han har same brikka som BYOC-pedalen, og er ei oppgradering frå AD-7, som eg har prøvd. Den var for so vidt artig, og eg likte rundgangslyden, der pedalen matar tilbake ekkosignalet i krinsen og legg endå meir ekko på. MXR Carbon copy har eg òg sett på. Flott lyd, men eg vil ha lengre ekkotid. Memory man, Memory lane og andre analoge pedalar er jaddi meg for dyre. So det får bli digital, då. Og tenk å byggje ein sjølv, og kunna kalle han for Dvergemål! Tøft, seier eg.